- 762 -

1452. Juni 1. o. O.

Herzog Johann confiscirt alle Zinsen und Renten, welche die Liegnitzer auf seiner getreuen Stadt Hainau haben und tritt ihr dieselben gegen eine bestimmte Summe ab, mit Ausnahme der Altar- und Spital-Zinsen.

Wir Johannes von gotes gnaden in Slezien herczug zum Brige, Legnicz, Goltberg vnd Haynaw & bekennen offentlichen mit desim briue allen den, dy en sehen, horen ader lezen, alzo die denne manne vnd stete der lande Legnitz vnd Goltberg vorczeiitin vnnsern vorfarenden anherren, eldervatern, vettern vnd auch vnsern liben herren vatern, allen seligis gedechtnisse vnd vns als rechten erben vnd nochkomen, als denne woloffinbar vnd landkundig ist, howldunge getan haben mit eren eiden, trawin vnd eren vnd als howldunge recht vnd gewonheit ist zu tuen, doruff denne die gestrengen woltuchtigin erbern vnd weizen .. manschaft der egnanten lande ader weichbilde Legnicz vnd Goltberg vnd dorczu die stat Goltperg mit eren eynwonern als erenfeste vnd vnvorruckte gute lute vns als ire rechte erbfursten vnd herren vfgenomen vnd sich an vns gehalden haben nach redlichin bestendigen vnsern alden keizerlichen kuniglichen vnd furstlichen vorschreibungen, die vnser erbrecht wolclerlichen besagen, belawten vnd ynnehalden vnd er trawe, eide vnd ere kegin vns habin lobwirdiglichen offin steen lassen, als erbern guten luten geborlichen wolczemit, sender die stat Legnicz mit eren inwoneren sulcher redlicher begangener erbholdunge nicht gevolget, sunder sich kegin vns doweder manchfeldiglichen gesatczt, ir trawe vnd ere obelbesonnen vnd daz denne cleglichen zu horen steet, eidebrochig worden sein, dorumbe wir auch zu en vnd eren gutern billichen dencken vnd synnen, wo wir mogen, alz zu den, die sich kegen vns groblichen abetronnig erczeiget vnd beweiset haben vnd als denne die vorgenanten Legniczer vnd etliche aws en besundern, wie die nomen haben ader wer die sein, etliche jerliche czinse gehabt haben, habin ader gehabn mochten in vnd off vnser stat Haynaw nach lawte irer briue vormals dorobir gegeben vmbe der vorgenanten missefarunge wille vnd ergangenen obiltat, wir vns derselben czinse vnd renten nach geborlicher achtunge vnderwunden, vnderczogen vnd dorczu gehalden haben, so zie kegen vns an czweyfel vil eines grosen vorfallen sein vnd dobeye vorbaz angesteen, getrawe, nutcze vnd willige dinste, die vns die vorgenannte vnnser stat Haynaw vnd alle ire eynwoner vnsere zunderliche liben getrawen offte vnd dicke, grozlichen vnd swarlichen haben tun musten vnd in grose schawlt dorvmbe komen sein, vns beistendig kegen den obgenanten Legniczern, das wir denne sunderlich betracht haben vnd haben von vnsern furstlichen gnaden nach solchen vorlawfenen geschichten dieselben jerlichen czinse in vnd off der vorgenanten vnser stat, der itczunt vnserr stat Haynaw vnd vnsern liben getrawen burgermeistern, ratmannen, eldisten, geswornen der ganczen gemeyne inwonern doselbst vnd allen iren nachkomen in rechter kowfczweize desto gewoniglicher vmb eine benante summa geldes abegetreten, ofgelassen, vorlehent, vorreicht vnd zugeeigent, oflassen, vorlehen, vorlehen vnd vorreichen &. — Gegeben am dornstage noch Pfingisten noch Cristi geburdt vierczenhundert jar donach in dem czweyvndfumfczigisten jore. Z.: George von der Bele, Nickel Schellendorf von Petirzdorf, Mertin Raspe, George Schellindorff.

Prov. Arch. Hainau, No. 145.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866